listen to RSG Nuus en Aktualiteit
RSG Nuus en Aktualiteit
Jacinta Ngobese-Zuma: "SA moet 'n muur bou"
Op 30 Junie, presies 'n maand gelede, het die land tot stilstand gekom weens die landwye optogte wat deur March and March gereël is, teen die teenwoordigheid van ongedokumenteerde buitelanders in Suid Afrika. Meer as 70-duisend mense is gerepatrieer na lande soos Malawi, Zimbabwe, Ghana en Nigerië as gevolg van hulle volgehoue druk. Maar was die optog suskesvol? Het dit die organisasie March and March nader gebring aan hulle eise vir beter wetstoepassing binne Suid Afrika en meer doeltreffende beheer van onwettige immigrante by ons grense? Ons het met die leier van die organisasie, Jacinta Ngobese- Zuma gepraat op Monitor.
Hoekom poging tot moord vir man wat vrou met MIV besmet?
‘n Man wat na bewering MIV doelbewus aan sy vriendin oorgedra het, sal na verwagting Maandag in die landdroshof in Pretoria verskyn. Hy word aangekla van poging tot moord en is tans in aanhouding. Die paartjie was in 'n verhouding tussen Oktober 2025 en Junie vanjaar. Hy het na bewering oor sy MIV-status gelieg totdat sy vriendin op anti-retrovirale medikasie tussen sy goed afgekom het. 'n Konfrontasie het gevolg waarna hy glo sy leuen erken het. Hy wou glo nie hê sy moet 'n verhouding met 'n ander man aanknoop nie. Die vrou het haar vir MIV laat toets en die uitslag was positief. Sy het daarna 'n klag by die polisie ingedien. 'n Voormalige regter wat spesialiseer in grondwetlike litigasie, advokaat Anna-Marie de Vos, het die konteks van die saak verduidelik aan Monitor.
Adams: "Ek wil my saak stel aan Madlanga"
Die hoof van die nasionale vervolgingsgesag, Advokaat Andy Mothibi, het Maandag opdrag gegee dat die strafsaak teen die hoof van die polisiediens se misdaadintelligensie-eenheid, Luitenant Generaal Dumisani Khumalo, laat vaar word. Khumalo en verskeie ander individue is deur die ondersoek-direktoraat teen korrupsie - IDAC - aangekla, nadat die leier van die National Coloured Congress, Fadiel Adams, verskillende sake hieroor aanhangig gemaak het. Hy het op Monitor met ons daaroor gepraat en sê hy sal nie die sake terugtrek nie en hou vol hy wil voor die Madlanga Kommissie verskyn om sy kant van die saak te stel.
Twee kante van die polisie se mislukking teenoor slagoffers van verkragting
Duisende uitstaande forensiese monsters, wat verband hou met verkragtings, moorde en seksuele misdrywe teen kinders, lê steeds onverwerk in die polisiediens se laboratoriums. In 'n ander storie: Indien die waarnemende minister van Polisie Feroz Cachalia nie dringend ingryp nie sal daar ook n nasionale krisis wees met ’n tekort aan verkragtings-bewys-toestelle. Wat word gedoen om die situasie te herstel? Ons het ook ’n breër gesprek afgeskop op Monitor oor hoe die polisiediens kan en moet verbeter. Minister Cachalia is tans besig om oorleg te pleeg met kunidges om met n herstelplan vir die polisie vorendag te kom. Ons het met ‘n voormalige polisielid en nou akademikus, Cobus Steenkamp gepraat oor sy vyf-punt-plan vir herstel, wat hy met Cachalia gedeel het.
'n Slang in die gras by die Openbare Beleggingskorporasie....
Die geskorste bestuurshoof van die Openbare Beleggingskorporasie Patric Dlamini het 'n dringende aansoek in die hooggeregshof in Pretoria ingedien om sy skorsing onwettige te laat verklaar. Dlamini is deur die raad afgedank weens bewerings deur 'n fluitjieblaser teen hom. DIe fluitjieblaser het beweer onder meer dat Dlamini 'n forensiese ondersoek na 'n belegging in Lanseria goedgekeur het sonder die raad se goedkeuring. Die minister van finansies Enoch Godongwana het intussen gesê dat hy binnekort 'n nuwe raad by die Belggingskorporasie aanstel nadat agt raadslede en die adjunk minister van finanasies David Masondo ook intussen bedank het. Die korporasie se grootste klient is die Suid-Afrikaanse Staatsamptenare pensioenfonds. Ons praat nou met Chris Wehmeyer, portefeulje bestuurder by PSG Wealth Pretoria-Oos.
100 Dae tot die verkiesing: Al jou vrae word beantwoord.
Vandag oor 100 dae vind die munisipale verkiesing plaas op 4 November plaas. Ons het op Monitor geleentheid gegee aan die luisteraars om hulle vrae te stel oor die dag wanneer ons almal ons kruisies gaan trek, asook die finale registrasieproses wat hierdie naweek weer plaasvind. Kan jy voor die tyd stem indien jy op die dag met vakansie gaan wees en wat gebeur met tieners wat net voor die verkiesing 18 word. Luister gerus.
Is die EFF besig om sy deuntjie oor grond te verander?
Hierdie vraag word deur professor Piet Croucamp van Noord Wes Universiteit gevra na afloop van die EFF se bekendstelling van sy verkiesingshandves. Duisende ondersteuners het die afgelope naweek die geleentheid by die Thoyandou stadion in Limpopo bygewoon wat ook gedien het as die party se 13de bestaansviering.
RSG se Helena van Vuuren groet ná 39 jaar...
Ná byna vier dekades by die SAUK, tree Helena van Vuuren op 31 Julie 2026 af... Haar laaste 25 jaar van die 39 jaar wat sy vir die SAUK gewerk het, was in Johannesburg in die amp as SABC Nuus: Kopieredakteur. Maar haar nuusneus het haar op vele paaie gelei, en haar baie dinge geleer... Ook van die lewe... én haarself. In Naweek Aktueel se profielonderhoud sê sy aan Esté de Klerk sy tree af met deernis, én heimweë...
Psigaters waarsku dat niks wat jy aan kletsbotte sê privaat is nie...
Wanneer iemand omstreeks drie-uur die oggend angstig, oorweldig of emosioneel is, is 'n sielkundige of psigiater dalk nie beskikbaar nie, maar 'n KI-kletsbot is net 'n paar tikke weg. Al hoe meer mense wend hulle deesdae tot kunsmatige intelligensie vir emosionele ondersteuning, want hulle glo professionele geestes-gesondheid-sorg is onbekostigbaar en ontoeganklik. Die Suid-Afrikaanse Vereniging van Psigiaters waarsku egter dat die raad wat kletsbotte oor geestesgesondheid verskaf, meer skade as goed kan doen. Ons praat meer hieroor met 'n psigiater en lid van die Suid-Afrikaanse Vereniging van Psigiaters, Dr Melané van Zyl,
DIGNITY SA gaan hooggeregshof toe oor bystandsdood...
Die Nasionale Vervolgingsgesag gaan nie 'n hofaansoek om wetgewing wat mediese bystanddood kriminaliseer, ongrondwetlik en ongeldig te laat verklaar, teenstaan nie. Dignity SA het dié aansoek in die Hooggeregshof in Pretoria gebring. Dié organisasie voer aan dat mense wat aan ongeneeslike siektes en erge pyn ly, ook die reg op menswaardigheid en liggaamlike outonomie, behoort te hê. Die mede-stigter van DignitySA, professor Willem Landman, sluit nou by ons aan…
Wat is die impak op Suid-Afrika as die Bab-Al-Mandeb-seestraat gesluit word?
Die Houthi-rebelle in Jemen, wat Iranse bondgenote is, het die belangrike olie vervoer-roete, die Bab al-Mandeb-seestraat, gesluit vir Saoedi-Arabiese skepe. Die Houthi-beweging sê ses skepe het intussen in die Rooisee omgedraai sedert hy sy maritieme blokkade op Saudi Arabië aangekondig het. Daar word berig dat twee swaar gelaaide tenkskepe nou 'n ander roete begin invaar het, wat baie duurder sal wees. Die BBC se Joanna Keen het meer besonderhede.
Gaan jou huis onteien word vir die Gautrain se uitbreiding?
Die Gautrein se roetes gaan binnekort uitgebrei word met 19 nuwe stasies wat oor die volgende 15 jaar beplan word. Maar ten spyte van dié goeie nuus oor beter openbare vervoer, is daar ook die baie sensitiewe kwessie van grondonteiening om plek te maak vir die treinspore. Voorstede en woongebiede soos Soweto en Mamelodi, asook dele van die Wes-Rand gaan eerste geraak word. Maar wat beteken dit vir woonhuise en besighede wat in die pad van die nuwe spore lê? Cor van Deventer, die direkteur van Aktebesorging by Van Deventer Dowlath & Marx het aan Monitor verduidelik hoe die onteieningsproses sal werk en waar jy moet kyk om seker dat dat jy nie geraak word nie.
Uitspraak deur hooggeregshof skep verwarring in egskeidings
Die Hooggeregshof in Kaapstad het onlangs beslis dat die lex domicilii matrimonii-reël ongrondwetlik is, omdat dit outomaties voorkeer gee aan die man in die egskeidings prosedures. Die hof het bevind dat dit ongrondwetlik is, omdat dit 'n voordeel kan gee aan net een party in die skeisaak. Vir wat die implikasies is van die uitspraak praat ons nou met Shando Theron van Theron Ingelyf, wat in Familereg spesialiseer...
Operasie Prosper is nie regtig suksesvol nie meen kenner
Die polisie is besig met 'n ondersoek na verskeie klagtes van brutaliteit deur lede van Operasie Prosper teen die publiek. Die polisie wil glo nie op die stadium te veel besonderhede bekend maak oor die hoeveelheid en aard van die klagtes nie. Die jongste klagte is egter van 'n man in Elsies Rivier in die Wes Kaap, wat glo so erg deur polisielede tydens die operasie aangerand is, dat hy sy bewussyn verloor het. Ons praat met 'n Direkteur van Sekuriteit vir die Verenigde Nasies in Hoë risiko lande en 'n voormalige senior weermag offisier Chris du Toit.
Ons MeerkKAT-radioteleskoop: 8 jaar van baanbreker-wetenskaplike ontdekkings
Die MeerKAT-radioteleskoop, sowat 90-kilometer buite Carnarvon in die Noord-Kaap, word wêreldwyd as een van die kragtigste radioteleskope van sy soort beskou. Sedert dit in Julie 2018 in gebruik geneem is, het dit baanbreker-ontdekkings gemaak: sterrekundiges van regoor die wêreld het tot dusver meer as 700 navorsingsartikels gebasseer op MeerKAT-data in toonaangewende internasionale vaktydskrifte gepubliseer. Dit is dalk een maatstaf van die teleskoop se sukses, maar watter impak het MeerKAT werklik gehad op die wetenskap, Suid-Afrika en die wêreld? Om dié vraag te beantwoord, het ons op Monitor met Professor Pieter Meintjies van die Astrofisika Navorsingsgroep by die Universiteit van die Vrystaat gepraat.
Die ombud van die Onafhanklike Direktoraat teen Korrupsie ondersoek klagtes teen verskeie senior amptenare van dié instelling.
Die pas-aangestelde ombud van die Onafhanklike Direktoraat teen Korrupsie - of Idac, die afgetrede regter, Joseph Raulinga het bevestig dat sy kantoor klagtes ondersoek teen verskeie senior amptenare van dié instelling. Hy wou hulle egter nie identifiseer nie, en sê die integriteit van die ondersoekproses vereis dat alle betrokke partye beskerm word. Die aanstelling van die ombud volg na bewerings voor die Madlanga-kommissie oor wangedrag en magsmisbruik deur sekere senior Idac-amptenare. Raulinga het gepraat by 'n mediakonferensie in Pretoria. Ons praat nou met 'n politieke ontleder van die Noordwes Universiteit se Sakeskool, Professor Andre Duvenhage..
Geen gevaar vir die publiek ná radioaktiewe besmetting by Koeberg
Die Minister van Elektrisiteit en Energie, Kgosientsho Ramokgopa, het Suid-Afrikaners gerus gestel dat drie afsonderlike voorvalle van radioaktiewe besmetting by die Koeberg-kernkragsentrale, nie 'n gevaar vir die publiek inhou nie. Volgens Ramokgopa was die voorvalle beperk tot Eenheid 2, waar instandhoudingswerk plaasgevind het. Die voorsitter van die Eskom-raad, Mteto Nyati, sê Koeberg se Eenheid 2 sal eers weer in werking gestel word, nadat alle veiligheidsvereistes nagekom is. Die energiekenner Corneels Schabbort het op Monitor ook die versekering gegee dat die publiek nie in gevaar is nie, en verduidelik presies hoe dinge skeef geloop het…..
Staak AARTO onmiddelik sê OUTA.
Die organisasie teen belastingmisbruik, OUTA , het die hof op 'n dringende basis genader met 'n aansoek om die tweede fase van die implementering van die Aarto-stelsel, stop te sit. Die Administratiewe beregting van Padverkeersoortredings het op 1 Julie na 60 munisipaliteite uitgebrei. Maar OUTA sê die implementering van dié wetgewing en sy stelsels is voortydig, omdat die regering nog nie die maatreëls wat padverbruikers wettiglik beskerm, in plek het nie. Advokaat Stefanie Fick is OUTA se hoof van verantwoordbaarheid en het op Monitor uitgebrei oor die hofgeding.
Die Good Party voel burgemeester is sleg vir Nelson Mandela Baai-metro
'n Derde mosie van wantroue is teen die burgemeester van die Nelson Mandelabaai Metro in die Oos-Kaap, Babalwa Lobishe ingedien. Dié mosie is deur die GOOD-party ter tafel gelê, omdat Lobishe glo NIE beslissende leierskap bied, te midde 'n groot diensleweringskrisis nie. Die Tesourie het ook besluit om die Metro se billike aandeel-toelae vir Julie terug te hou. Raadslid Lawrence Troon van die GOOD-party wat die mosie dryf, het op Monitor daaroor gepraat.
Die skrap van KI-kontrole beteken nie 'n "Free For All" vir studente nie, se KOVSIES
Die Universiteit van die Vrystaat het pas die gebruik van sy Kunsmatige Intellegensie-opsporing-sagteware gestaak weens kommer oor akkuraatheid. Die universiteit beweer dat die KI-opsporing nie betroubaar genoeg is om tussen mens en KI-geskrewe werk te onderskei nie. Die universiteit se hy sal voortaan eerder steun op akademiese oordeel, deeglike assessering en die verantwoordelike gebruik van KI. Prof Francois Strydom, senior direkteur by die Sentrum vir Onderrig en Leer aan die Universiteit van die Vrystaat het op Monitor hieroor gepraat.
Save video to ...
