listen to RSG Nuus en Aktualiteit
RSG Nuus en Aktualiteit
Nog 'n ANC vloekvoorval plaas die party se verkiesingsveldtog onder die vergrootglas
Die Minister van Water en Sanitasie, Pemmy Majodina, is in warm water nadat sy 'n vloek met 'n vloek beantwoord het tydens 'n gemeenskapsvergadering in Kouga in die Oos-Kaap. Sy het gevra dat 'n man op krukke na buite vergesel word, glo omdat hy nie na rede wou luister nie. Op pad uit het hy haar gevloek, en Majodina het teruggevloek. Die voorval volg kort nadat die burgemeester van Johannesburg, Dada Morero, ook in die sop was nadat hy op 'n inwoner gevloek het. Die ANC het groot aspirasies vir die plaaslike regeringsverkiesings op 4 November. Professor Piet Croucamp van die Noordwes Universiteit se Sakeskool, is gepols oor die ANC se jongste verleentheid.
Dis hoekom krane nog droog is in Beaufort-Wes
Die Wes-Kaapse regering en die Beaufort-Wes munisipaliteit werk nou saam om watertoevoer na die oudste dorp in die Sentraal Karoo, te herstel. Inwoners sit sedert verlede week met droeë krane, weens oorstromings wat noodsaaklike watervoorsieningsinfrastruktuur beskadig het. Een-miljoen-rand is intussen beskikbaar gestel om noodherstelwerk in die dorp, te ondersteun. Die Wes-Kaapse minister van Plaaslike Regering, Omgewingsake en Ontwikkelingsbeplanning, Anton Bredell het dit so op Monitor verduidelik.
Ambassadeur Roelf Meyer hou sy lyf rugby kenner....
Die laaste toets in die Greatest Rivalry reeks teen die All Blacks vir die naweek plaas. Duisende Springbok ondersteuners word by die wedstryd verwag.Jody Hendricks het met ambassadeur in dieVSA Roelf Meyer oor die opgewondenheid in die VSA oor die wedstryd gepraat.
Is jy KI geletterd?
Vandag is Internasionale Geletterdheidsdag met 'n sterk fokus op die belangrikheid van lees, skryf en die verwerking van inligting. In 'n wêreld waar Kunsmatige Intelligensie al hoe meer deel van ons daaglikse lewens én die nuuskantoor word, vra ons: Wat moet 'n joernalis van KI weet, en hoe kan hulle dit verantwoordelik gebruik sonder om die publiek se vertroue te verloor? Vir meer hieroor praat ons met 'n buitengewone professor in joernalistiek aan die Universiteit Stellenbosch en ombud van News24, Professor George Claassen....
Parkeweek begin ten spyte van vloedskade aan infrastruktuur
Die jaarlikse inisiatief van SANParke, waar dagbesoekers vir 'n week gratis toegang tot die meeste van die land se nasionale parke kan kry, begin vandag, tot 13 September. Verskeie natuurrampe het vroeër vanjaar 'n aantal parke, onder meer die Krugerwildtuin, asook die Tuinroete- en Bontebok- Nasionale Parke, getref. Maar besoekers sal egter vandeesweek dié besienswaardighede kan geniet, berig Lizaan Groenewald........
Verkiesingsnuus: Good en UDM stel burgermeesterskanidate bekend en Ipsos praat oor hulle peiling
Die GOOD-party se sekretaris-generaal, Brett Herron, sal die party verteenwoordig as die burgemeester-kandidaat vir Kaapstad in die opkomende plaaslike regeringsverkiesing op 4 November. Die politieke party, wat in 2018 gestig is, het gister sy burgemeesterkandidate bekend gestel vir die 20 munisipaliteite waarin hy sal deelneem. Ricardo van der Merwe is aangekondig as die party se kandidaat vir die burgemeesterpos in die Weskus-distriksmunisipaliteit, terwyl Marius van Stade in die Stellenbosch-plaaslike munisipaliteit sal deelneem, en Katriena Rubyn in die Witzenberg-plaaslike munisipaliteit. Die leier van GOOD, Patricia de Lille, verduidelik wat die party se plan-van-aksie is...
Arina Jooste: Soldaat,Soldaat se vrou, Dankie Tannie en Mamma Rhino - luister na haar storie.
Onthou jy destyds die dankie tannie pakkies wat soldate op die grense ontvang het? Kan jy so 'n tannie onthou? Wel een van die soldaat vroue wat deel was van die projek Arina Jooste het pas 'n boek bekend gestel getiteld Sy wat wil diien ... waarin sy vertel van haar ervaringe. In die boek vertel sy hoe die waardigheid van vrou van soldate in die afgelee oorlogsgebiede behoue gebly het deur tradisies soos om nuwe innames met handskoene sykouse en 'n hoed te verwelkom. Arina Jooste sou ook later mamma Rhino word toe haar man Generaal Johan Jooste aangestel sou word as die hoofveldwagter wat die aanslag op ons renoster moes keer. Arina sê dit is tyd dat mense moet hoor wat vroue moes deurmaak terwyl hulle mans in die grensoorlog geveg het
Hoekom bly vroue in verhoudings waarin hulle mishandel word?
Daar is verskeie redes hoekom vroue in verhoudings bly waarin hulle mishandel word, en vrese is soms baie diepgewortel. Organisasies wat hulle vir vroueregte beywer meen vroue wat in verhoudings is waar hulle mishandel word, moet vir hulleself 'n sogenaamde Vryheidsfonds opbou. Navorsing wys dat finansiële afhanklikheid een van die redes is waarom soveel vroue in onveilige verhoudings bly. Maar dit is egter nié die enigste redes hoekom vroue hulleself betwyfel oor of hulle die verhouding moet verlaat nie. In Naweek Aktueel praat Esté de Klerk met Juanita du Preez, Action Society se nasionale woordvoerder.
'n Doktorsgraad-gegradueerde van Atlantis deel haar storie van hoop
Atlantis is 'n vergete dorp aan die Kaapse Weskus wat dikwels die nuus haal vir euwels soos bendegeweld, dwelm-en- alkoholmisbruik, en tienerswangerswappe. Die dorp is 'n uitvloeisel van die apartheidsregering se groepsgebiedewet wat hoofsaaklik bruin mense in 1976 daar neergeplak het. Maar te midde van donker tye, is daar altyd 'n sprankie hoop. In NaweekAktueel se profiel-onderhoud vertel die 29-jarige Allison Matroos van Atlantis hoe sy haar doktorsgraad in Afrikaans en Nederlands aan die Universiteit Stellenbosch verwerf het. In Naweek Aktueel se profielonderhoud, sê Allison aan Annelene Moses hoe bevoorreg sy is om te kon gaan swot en hoe die motivering van die studente vir wie sy soms klasgee, die grootste deel van haar liefdestaak is...
NAWEEKAKTUEEL5 September 2026
Hoekom is dit so moeilik vir vroue wat vasgevang is in verhouding waarin hulle mishandel word, te stap? In Naweek Aktueel praat Esté de Klerk met die nasionale woordvoerder van Action Society, Juanita du Preez; 'n doktorsgraad-gegradueerde van Atlantis vertel haar storie; dis Internasionale Liefdadigheidsdag; en Jody Hendriks praat weer met die filosoof en politieke ontleder, professor Pieter Duvenhage oor die rugbystryd tussen die Springbokke en die All Blacks.
Vroue moet hullself bemagtig. Die NRO Girls on Fire help hiermee.
Meer as 50-duisend geslagsgebaseerde geweldsake en sake van vroue wat deur hulle lewensmaats vermoor word, word elke jaar by die polisie aangemeld. En, statistiek toon aan dat 110 vroue elke dag in die land verkrag word. Meer en meer vroue bemagtig hulleself met wapens om hulleself te kan beskerm. Die nie-regeringsorganisasie, GOSA Girls On Fire, wat in 2015 deur Lynette Oxley gestig is, help hiermee deur vroue emosioneel en fisies te om na hulle eie veiligheid te kan omsien. Esté de Klerk het met Lynette Oxley in Naweek Aktueel gepraat oor hoekom sy dié organisasie begin het.
Nuwe skool handboeke op ys gesit
Die Minister van Basiese onderwys Siviwe Gwarube het die verspreiding van nuwe leer-materiaal vir die 2027 akademiese jaar vir nou eers opgeskort. 6 385 nuwe titels is aanvanklik goedgekeur vir die gebruik deur leerders tussen graad 1 en 3. Die departement is egter genoop om ondersoek in te stel, nadat dit aan die lig gekom het dat die maatskapy wat die grootse kontrak ontvang het, eers 3 dae na die formulering van die spesifikasies vir die tender, geregistreer is. Die Minister Siviwe Gwarube het aan Monitor verduidelik hoekom die besluit geneem is.
“Ek weet wie verantwoordelik is vir my vrou se dood.”
So sê Romero Hector aan Monitor. Die wewenaar van een van die drie bemanningslede van die SAS Manthathisi wat op 20 September 2023 by Kommetjie in Kaapstad omgekom het. Hector, se brandende begeerte na antwoorde kan nie uitgedoof word nie. Die tragiese gebeure het sy vrou, luitenant-kommandeur Gillian Hector, van hul gesin weggeruk. Wat hom tot raserny dryf, is dat nie die Vloot of die Suid-Afrikaanse Nasionale Weermag enige aanspreeklikheid wil aanvaar nie. 'n Ondersoek is gedoen en verlede jaar het Hector verneem die verslag is so geklassifiseer dat bitter min mense toegang daartoe het. Hy het verlede jaar 'n suksesvolle PAIA-aansoek in die verband gebring. Die Valke se ondersoek na óf enigiemand strafregtelik vervolg kan word, het ook drie jaar gelede begin, maar is nog nie afgehandel nie.
Verkiesingsnuus: SAKP Wes-Kaap van ANC hof toe
Die Suid-Afrikaanse Kommunistiese Party in die Wes-Kaap het regstappe teen die provinsiale ANC geneem, nadat die laasgenoemde besluit het om die SAKP se provinsiale sekretaris, Benson Ngqentsu, van die Wes-Kaapse provinsiale wetgewer, te verwyder. Ngqentsu en twee ander raadslede in die Suid-Kaap- en Overberg-streke is uit die kussings gelig, na bewerings dat hulle by 'n ander politieke party aangesluit het. Die SAKP in die provinsie beskryf die afdankings as 'n beplande verwydering van lede, wat die party in die openbaar verteenwoordig. Lizaan Groenewald het meer besonderhede.
Tatjana wag nou nog vir haar geld by Swem SA
Suid Afrika se mees bekroonde Olimpiese atleet ooit, Tatjana Smith, is steeds in 'n regstryd met Swem Suid Afrika gewikkel. Haar prokureurs eis die betaling van rente op die prysgeld, wat sy met 'n silwer en ‘n goue medalje verdien het by die wêreldkampioenskap in Fukuoka, Japan in 2023. Die 35-duisend Amerikaanse dollar wat sy verdien het, is eers 'n jaar na die kompetisie oorbetaal. Swem SAmoet nog repliek lewer oor wat eintlik met die rente gebeur het, en hoekom dit solank geneem het om die aanvanklike prysgeld oor te betaal. Haar prokureur, Wian Spies, het klarigheid verskaf oor die eis wat tans voor die beheerliggaam se deur lê.
Sal jy jou belasting bewillig om vroue uit die greep van mishandeling te bevry?
Organisasies wat hulle vir vroueregte beywer sowel as regslui praat al hoe meer van 'n vryheidsfonds of in Engels, 'n Freedom Fund vir vroue wat in verhoudings is, waar hulle mishandel word. Navorsing toon dat finansiële afhanklikheid een van die redes is, waarom soveel vroue in onveilige verhoudings bly. Die idee is dat die vrou 'n vryheidsfonds begin met die hulp van die regering. Dit is hier waar geld gespaar word vir wanneer die vrou genoeg het, om so 'n verhouding te verlaat. 'n Spesialis-prokureur in familiereg, Shando Theron het aan Monitor gedeel, hoe so 'n fonds dalk kan werk. Sou dit vir jou 'n goeie aanwending van ons belasting geld wees?
Operasie Prosper floreer sê die president...
President Cyril Ramaphosa sê dat Operasie Prosper baie goed verloop sover. Statistiek toon aan dat moorde in 14 van die 17 probleem gebiede afgeneem het, sedert Operasie Prosper begin het. Ramaphosa het vrae beantwoord in die parlement oor die operasie. Hy het wel erken dat vlakke van geweld in die gebiede nog hopeloos te hoog is. Ons praat nou met 'n senior navorser by die Instituut vir Sekerheidstudies, Willem Els...
Onderwysers word dalk verbied om in privaat met leerders te kommunikeer.
Onder watter omstandighede mag 'n onderwyser privaat op 'n elektroniese platform met jou kind kommunikeer? Die antwoord hierop sal eersdaags uit 'n reeks nuwe regulasies deur die Departement van Basiese Onderwys blyk. Die departement is hiermee getaak as 'n moontlike teenvoeter vir die verkragting van minderjariges. 'n Tussentydse verslag sal die rigting aanwys van hoe regulasies oor elektroniese kommunikasie binne skole aangepas sal word. Ons het op Monitor met met die uitvoerende hoof van die Federasie van Beheerliggame van Suid-Afrikaanse Skole, Dr Jaco Deacon gepraat.
Hoekom word diere keelaf gesny, tydens veediestal?
DIE VOLGENDE BYDRAE BEVAT BESONDERHEDE WAT SENSITIEWE LUISTERAARS KAN ONTSTEL..... In Steynsrus in die Vrystaat het 'n veeboer uit pure wanhoop die karkasse van minstens 20 lammers wat keelaf gesny en agtergelaat is, by die plaaslike polisiekantoor afgelaai. Die boeregemeenskap kom gereeld op traumatiese slagtonele af waartydens die diere wat nie gesteel word nie, sommer keelaf gesny word. Die geskorste Minister van Polisie, Senzo Mchunu, het die provinsie in Maart verlede jaar besoek om homself van die omvang van veediefstal te vergewis. 'n Veiligheidsrisiko-ontleder van Vrystaat Landbou, dr. Jane Buys, het die situasie aan Monitor verduidelik.
Kudde immuniteit in gedrang ,,,
Soos jy reeds vroeer gehoor het , het Die Nasionale Instituut vir Oordraagbare Siektes 'n waarskuwing uitgereik oor die voorkoms van die sogenaamde Rotavirus by kinders jonger as vyf jaar. Die Instituut sê daar was 'n skerp toename in gevalle van die siekte in Pretoria. Een sterfte is aangemeld. Die Rotavirus is 'n bekende diaree-infeksie wat by kinders voorkom. Intussen het die Nasionale departement van gesondheid gewaarsku dat Suid-Afrika die risiko loop om kudde immuniteit teen kinders siektes soos masels en duitse masels te verloor, omdat daar 'n afname in inentings is. Volgens die departement het die hoeveel kleuters wat nie inentings gekry het nie van 12 komma een persent in 2017 tot 36 komma drie persent gestyg in Januarie en April die jaar. Ons praat nou Prof. Leenta Grobler, Medeprofessor: Digitale Gesondheid en Innovasie by die Noord Wes Universiteit se departement van Gesondheidswetenskappe.
Save video to ...
